Malta l-ewwel pajjiż fl-Ewropa li ta permess biex jiġi sparat logħob tan-nar minn fuq drones.

Malta, permezz tad-Direttorat għall-Avjazzjoni Ċivili fi ħdan Transport Malta kienet l-ewwel pajjiż fl-Ewropa li ta awtorizzazzjoni biex jiġi mtella’ logħob tan-nar minn fuq drones.

Dan kien rifless f’pajjiżna waqt l-għeluq tal-Festival Internazzjonali tan-Nar fil-Port il-Kbir li matul l-imsemmi spettaklu pirotekniku ra s-sehem ta’ 550 drone.

“Pyroemotions”, il-kumpanija piroteknika li tagħmel dawn it-tip ta’ spettakli pirotekniċi fl-Ewropa hija rreġistrata f’Malta u ftit tax-xhur ilu tellgħet avvenimenti ta’ din l-għamla f’Aosta fl-Italja; Burgio fi Sqallija u mistennija oħrajn fl-Italja u l-Montengro għaż-żmien li ġej.

L-Awtorità għat-Trasport tirringrazzja lil Korp tal-Pulizija, id-Dipartiment tal-Protezzjoni Ċivili, l-Għaqda Piroteknika ta' Malta u l-entitajiet kollha konċernati tal-kollaborazzjoni sħiħa biex seta’ jsir dan l-ispettaklu bid-drones f’pajjiżna għal ewwel darba.

Id-Direttorat għall-Avjazzjoni Ċivili fi ħdan Transport Malta, bħala membru sħiħ tal-Aġenzija għas-Sigurtà tal-Avjazzjoni tal-Unjoni Ewropea (EASA) ser tkompli tikkollabora mal-Aġenzija biex jiġu ntrodotti kunċetti ġodda kemm dawk marbutin ma’ swarm drones kif ukoll drones li minnhom jista’ jiġi sparar ta' nar tal-ajru.